Жылнаама

18- Сентябрь 1999 -жылы Миң чамалуу Өзбекстан ислам кыймылынын согушчандары Кадамжайдын Сырт жана Баткендеги Газ кыштактары багытында чабуул коюшкан

Миң чамалуу Өзбекстан ислам кыймылынын согушчандары Кадамжайдын Сырт жана Баткендеги Газ кыштактары багытында чабуул коюшкан. Бир күн мурун алар Кадамжай блокпостуна кол салып, согушчан анабашчылардын бири Абдулазиз Юлдашевдин өлүмүнө байланыштуу кыргыз аскерлерине каршы кысымын күчөтүшкөн.

Баткен согушуна катышкан аскерлердин республикалык комитеттин төрагасы Сатыбек Молдалиев бул боюнча төмөнкүлөрдү эскерди: "Майлуу-Суу шаардык өзгөчө багыттагы батальон 400-600гө жакын душмандар менен салгылашып, көп командирлерин өлтүргөн. Ошонун ичинде баш кесер, мыкаачы колу жок Абдулазиз деген командир өлтүрүлгөн. Сырт айылы Кадамжай району менен Баткен районунун чек арасы. Майлуу-Суунун аскерлери баатырдык көрсөтүп, душмандардын чоң тобун жок кылып, Өзбекстанга өткөрбөй койгон. Командирлери өлтүрүлгөндөн кийин калган мүчөлөрү туткунга түшүрүлгөн. Жалпы миң чамалуу согушчан болгон. Сырт айылына 18-20 чакырым аралыктан салаалап ар кайсы коктулардан каптап киришкен. Согушкерлердин башкы отряды жок кылынгандан кийин калгандары качып кетишкен".