Жылнаама

19- Июль 1984 -жылы Советтик актриса Фаина Раневская көз жумган

Советтик актриса, СССРдин Эл артисти Фаина Раневская 87 жашында оорудан улам Москвада көз жумган. Анын сөөгү Москвадагы "Жаңы Донск" көрүстөнүндө эжеси Изабелланын жанына жерге берилген.

Фаина Георгиевна (Григорьевна) Раневская 1896-жылы 27-августта Орусиянын Таганрог шаарында туулган. Ал Таганрог Мариинск кыздар гимназиясын аяктап, А.Ягеллонун (А.Н.Говбергдин) жеке менчик театр студиясында таалим алган.

Фаина Раневская Москва алдында, Крымда, Ростов-Дондо, Бакуда, Архангелскиде, Смоленскиде жана башка шаарларда ар кыл театрларда ролдор аткарган.

Москвада Камералык театрда (1931-1935), Кызыл Армиянын Борбордук театрында (1935-1939), Драма театрында (азыркы В.Маяковский атындагы Москва академиялык театры, 1943-1949), А.С.Пушкин театрында (1955-63), Москеңеш атындагы театрда (1949-1955, 1963-1984) иштеген.

1934-жылы алгачкы жолу кинодо - Михаил Роммдун "Болтогой" ("Пышка") деген тасмасында рол аткарган.

Айтылуу "Карлсон кайтып келди" деген мултфилмдин үнүн жаздырууда, ал Фрекен Бок деген кейипкердин үнүн окуп берген.

Британдык "Who is Who" энциклопедиясы 1992-жылкы чыгарылышында аны 20-кылымдагы даңазалуу өнөрпоз айымдардын тизмесине кошкон.