Жылнаама

13- Март 2009 -жылы Коомдук жана саясий ишмер Медет Садыркулов каза болгон

13-мартта таңкы саат бештер чамасында Бишкектен алыс эмес жайгашкан Кой-Таш айылы тараптагы капчыгайда токтоп турган Лексус унаасы Аудини сүзүп, өрт чыккан. Лексустагы үч адам таанылбай турган деңгээлде күйүп кеткен. Каза болгондордун бири президенттик администрациянын экс-башчысы Медет Садыркулов болгон.

Коомдук жана саясий ишмер Медет Садыркулов 1953-жылы 13-декабрда Чүй облусунун Кемин районунун Ильич айылында төрөлгөн. Түбү казак деп көптөрү айтып жүрүшкөндөрү менен расмий документтеринде кыргыз деп жазылган. Жогорку билимди Кыргыз мамлекеттик университетинде алып, тарыхчы адистигине ээ болгон. Кошумча билими: Юриспруденция, саясий илимдердин кандидаты, РФнын Жергиликтүү өзүн-өзү башкаруу академиясынын мүчө-корреспонденти. Эмгек жолу 1971-жылы Ильич атындагы мамлекеттик асыл тукум заводунда жөнөкөй жумушчу болуудан башталып, жогорку окуу жайын бүтүргөндөн соң Кыргыз мамлекеттик медициналык институтунда (1977-1991-жж.) мугалим болуп эмгектенген. 1991-жылдан тартып ал мамлекеттик кызматта - Кыргыз Республикасынын Президентинин аппаратында, 1995-жылы президенттик администрацияда иштеген. Төрт жыл аралыгында референттиктен уюштуруу иштери боюнча бөлүмдүн башчылыгына чейин көтөрүлгөн. 1995-жылы Бишкек шаарынын Биринчи май районунун акими, 1997-1999-жылдары каржы министринин биринчи орун басары, кийин мамлекеттик салык инспекциясынын директору болгон. Ал эми 1999-жылы кайрадан Ак Үйгө, президенттин администрация жетекчилигине чакырылган. 1999-2000-жылдары Эсеп палатасынын төрагасы, 2000-2005-жылдары Кыргызстандын Ирандагы атайын жана ыйгарымдуу элчиси болгон. Ошону менен катар эле мамлекеттик кызматтын 1-класстагы жана салык кызматынын 2-рангдагы, Кыргыз Республикасынын атайын жана ыйгарымдуу элчилик рангындагы мамлекеттик кеңешчиси класстык чиндеринин ээси болгон. 2006-жылы Медет Чоканович кайрадан Кыргыз Республикасынын президенттик администрациясына чакырылып, администрация жетекчисинин биринчи орун басары, мамлекеттик башкаруу саясаты жана уюштуруу иштери боюнча бөлүм башчысы болот. 2007-жылдын 30-мартынан 16-апрелине чейин кыргыз өкмөтүнүн аппарат жетекчилигине, 2007-жылдын 16-апрелинен 2009-жылдын 8-январына чейин президенттин администрация жетекчилигине дайындалып, иштеп келген. 2009-жылдын 8-январында өз каалоосу менен отставкага кеткен.