Жылнаама

6- Июль 1994 -жылы АКШнын экрандарында “Форрест Гамп” фильми жарыкка чыккан

АКШнын экрандарында “Форрест Гамп” фильми жарыкка чыккан. Таманын жанры – драма, мелодрама, ал эми режиссёру – Роберт Земекис. Тасмадагы башкы ролдорду Том Хэнкс, Робин Райт, Гэри Синиз, Майкелти Уильямсон, Салли Филддер аткарышкан. Фильмдин бюджети – 55 миллион долларды түзүп, сатыктан түшкөн каражат – 677, 4 миллион доллар болгон.

Тасманын башкы каарманы Форрест Гамп – тубаса кем акыл бала. Ал мүмкүнчүлүгү чектелген балдардын мектебинде гана билим алышы керек эле. Бирок апасы уулун катардагы окуучулардын арасына кошуу үчүн мектеп директору менен мамилелеш болуп, Форрестти өзү каалаган мектепке киргизет. Классташтарынын мазактоосу менен чоңойгон Форресттин мектепте бир гана досу – Женни Каррен аттуу кыз болгон. Алардын достугу кийин сүйүүгө айланат. Кичинесинде тийишкен балдардан дайыма качып кутулган Форресттин жакшы чуркаганы кийин университетте окуп калуусуна шарт түзөт. Анткени ал окуй турган университеттин командасына жакшы чуркаган оюнчу керек болгон.

Окуусун аяктагандан кийин аскерге, андан соң Вьетнамдагы согушка катышып, көп эрдиктерди көрсөтөт. Өзү жаракат алса да, буктурмада калган жарадар аскерлерди куткарып, бул эрдиги үчүн өлкө башчы тарабынан мамлекеттик сыйлык менен сыйланат. Андан соң аскерде чогуу кызмат өтөп, Вьетнамдагы согушта каза болгон досу Бубба экөөнүн "деңиз креветкасын саткан өндүрүш ишин баштайбыз" деген максатын ишке ашырып, миллионер болууга жетишет. Миллионер болсо да газондогу чөптөрдү бекер тегиздеп, коомго үлгү көрсөтүүнү унутпайт. Дос кызы Женни Каррендин колун сурап, ал макул болбой койгондо ызасына чыдабай чуркаганы көп жылдарга созулуп кетет. Жыл өткөн сайын анын катарына кошулуп чуркаган элдин саны да артат. Соңунда сүйүктүүсү Женни Карренге үйлөнүп, уулдуу болушат. Тилекке каршы, Женни айыккыс дарттан каза болуп, Форрест уулу менен жалгыз калат.

Дал ушундай мазмундагы фильм жарыкка чыгар замат ийгиликтерди багындырган. Тасма сыйлыктардын "атасы" катары таанымал болгон. Голливуддун шедеври баш-аягы 38 сыйлык алган.