Жылнаама

13- Октябрь 1882 -жылы кыргыз элинин улуу комузчусу Карамолдо Орозов туулган

Улуу комузчу, композитор, Кыргыз Эл артисти Карамолдо Орозов Ысык-Көл районунун Корумду айылында туулган. Ал 9-10 жашынан эле комузда ойноп, ар кандай күүлөрдү черте баштаган. Карамолдо Орозовдун өз аты — Токтомамбет. Ал айылдык диний мектептен билим алгандыктан, молдо аталган. Өзү кара тору жигит болгондуктан, аны Карамолдо деп коюшкан. Кийин ал белгилүү кыякчы жана комузчу Мураталы Күрөңкеевден таалим алган.

1928-жылы элдик өнөрпоздор менен бирге Фрунзеге (азыркы Бишкек шаарына) чакыртылган. Ошондо Карамолдонун 30дай күүсүн А.В.Затаевич нотага түшүргөн. Ал алгач Кыргыз музыкалык драма театрынын, анан Кыргыз филармониясынын артисти болуп эмгектенген. 1939-жылы СССР Композиторлор союзуна мүчө болгон. Карамолдо Орозовдун элдин өткөндөгү турмушун баяндаган "Сынган бугу", "Көкөй кести", "Чоң кербез", ошондой эле философиялык мазмундагы "Насыйкат", "Ибарат" күүлөрү эл арасында кеңири чертилет. Анын күүлөрү кыргыз музыкасынын классикалык музыкаларынан болуп саналат.