Жылнаама

9- Май 1977 -жылы Төкмө акын Жеңишбек Жумакадыр төрөлгөн

Төкмө акын Жеңишбек Жумакадыр Нарын районунун Эмгекчил айылында төрөлгөн. Мектепте окуп жүргөндө эле ыр жазчу. 7 жашында атасы каза болуп, чоң атасынан тарбия алган. Чоң атасы акынды 9-классты аяктагандан кийин Нарындагы ПТУга окууга тапшырткан. Эки ай окугандан кийин обончу Керезбек Тургуналиевди жолуктуруп, аны менен Нарын театрына барып ырдап, театрдагыларга жагып, 15 жашында паспортунун жоктугуна карабай келишимдик негизде жумушка орношкон. СССРдин эл артисти Капар Медетбеков баштаган Сейитказы Андабеков, Бакирдин Алиев өңдүү залкарлардын мектебинен өткөн. Жеңишбек Жумакадыр төкмө акындык өнөрүн алгачкы жолу 1993-жылы Кыргыз Республикасынын Куралдуу күчтөрүнүн түзүлгөнүнүн бир жылдыгына арналган, Бишкектеги аскерлер арасында чыгармачылык жарышында билген. Ал жарышта баш байгени жеңип алган.

Ошол эле жылы бир айдан кийин Бишкекке айтышка Табылды Актанов менен келип, айтыштан биринчи орунду ээлеген. Андан кийинки ири айтыштарда баш байгелерди алып, бат эле элге комузу жок жөө акын катары таанылган. Андан соң Ашыралы Айталиев өзүнүн комузун карматып Ташкентке Тууганбай Абдиев менен кошуп жиберген. Ошондон баштап комуз менен ырдап калган. Акын Москвадагы М.С.Щепкин атындагы жогорку окуу жайын бүтүргөн. Жеңишбек Жумакадыр актёрдук кесипке ээ болгону менен Хан Жантайдын ролун гана ойногон.