Жылнаама

15- Май 2015 -жылы V чакырылыштагы Жогорку Кеӊештин депутаты Карганбек Самаков коррупция беренеси боюнча шектелип, камакка алынган

V чакырылыштагы Жогорку Кеӊештин депутаты Карганбек Самаков коррупция беренеси боюнча шектелип, камакка алынган. Кылмыш иши 14-майда козголуп, Самаков Чүй облусунун Кара-Жыгач, Байтик жана Лебединовка айыл аймактарындагы 262 гектар жер тилкесин мыйзамсыз трансформациялоо (айдоо аянттарын үй салууга боло турган категорияга которуу) кылмышына айыпталган. Бул жер тилкелерин сатуудан депутат 8 миллион доллар пайда көргөнү айтылган. Камалгандан аз өтпөй УКМКнын алдына депутаттын тарапташтары чогулушуп, колдоо көрсөтүү үчүн келишкенин билдиришкен. Эртеси Самаковдун тарапташтары Башкы прокуратуранын алдына чогулуп, митинг өткөрүшкөн.

17-май күнү Октябрь райондук соту Карганбек Самаковду 2 айга үй камагына чыгарган. Ага Бишкек шаарынын Октябрь районунан чыгууга, чоочун адамдар менен сүйлөшүүгө, почта, интернет жана телефон аркылуу байланышууга, митинг жана маалымат жыйындарын өткөрүүгө, жашаган жеринен саат 20:00дөн 08:00гө чейин чыгууга тыюу салынган.