Жылнаама

19- Май 1937 -жылы Советтик режиссёр Али Хамраев туулган

Советтик режиссёр Али Хамраев Өзбекстандын Ташкент шаарында туулган. Атасы тажик-өзбек элинин актёру, сценаристи, кинодраматургу болгон. Бир нече тасмаларда башкы ролдорду жараткан. Режиссёр төрөлгөндөн кийин эле атасы 1937-жылы репрессиянын учкундары менен камакка алынып, эки жылдан соӊ бошотулган. Камактан чыккандан кийин деле көп жашаган эмес. 1942-жылы Улуу Ата Мекендик согушта курман болгон.

Али Хамраев 1961-жылы ВГИКти аяктап, Ташкентке келип "Өзбекфильм" киностудиясында иштеп калган. "Апапак илегилектер" ("Белые, белые аисты")тасмасынан кийин колунан иш келерин байкаган жетекчилик революция тууралуу ленталарды тартууга ишеним көрсөтүп, "Жетинчи ок" ("Седьмая пуля"), "Жан сакчы" ("Телохранитель"), "Өзгөчө комиссар" ("Чрезвычайный комиссар") деген тасмаларды биринин артынан экинчисин тарткан. Учурда Италияда жашайт (2015). Италияда жашап жараткан эмгеги катары 1998-жылы тартылган "Бо Ба Бу" тасмасын атоого болот.Союз тарагандан кийин Микеланжело Антонионинин чакыруусу менен баатыр Тамерландын тарыхын экрандаштыруу үчүн Италияга сапар алат. Темирлан туурасындагы тасма тартылбай калган, бирок ошондон кийин Италияда жашоону туура көргөн. 2015-жылы 16-майда "Ак илбирс" кыргыз улуттук киносыйлыгын алган.