16- Январь 1936 -жылы Кыргыз Республикасынын Баатыры, Кыргыз Республикасынын Эл жазуучусу, драматургу жана кинодраматургу Бексултан Жакиев туулган
Кыргыз Республикасынын Баатыры, Кыргыз Республикасынын Эл жазуучусу, драматургу жана кинодраматургу Бексултан Жакиев 16-январда 1936-жылы Ысык-Көл облусуна караштуу, Тоң районунун, Бөкөнбаев айылында туулган. Драматург, кинодраматург, Кыргыз ССРинин искусствого эмгек сиңирген ишмери (1974), Кыргыз эл жазуучусу (1993), Кыргыз ССРинин Токтогул атындагы мамлекеттик сыйлыгынын (1989), Казакстандын Төлөгөн Айбергенов атындагы эл аралык сыйлыгынын (1994) жана Жамбыл Жабаев атындагы эл аралык сыйлыгынын (1996) лауреаты. 1958 КМУнун филология факультетин бүтүргөн. Киносценарийчилердин Москвадагы эки жылдык жогорку курсунда окуган (1960–1962). «Кыргызфильм» киностудиясында редактор (1963–1968), Кыргыз ССР Маданият министрлигинде (1968–1972), Кыргыз ССР Мамлекеттик кинематография комитетинде башкы редактор (1972–1975), Кыргызстан театр ишмерлер союзунун секретары (1988–1992), Кыргыз Республикасынын президентинин мамлекеттик кеңешчиси (1992–1993), «Манас-1000» мамлекеттик дирекциясынын көркөм жетекчиси, директору (1994–2000), 1994-жылдан Кыргыз Республикасынын Токтогул атындагы мамлекеттик сыйлыгы боюнча комитеттин төрагасы. Б.Жакиев коомчулукка «Атанын тагдыры» (1959) аттуу алгачкы драмасы менен таанылган. Анда драматург кайраттуу карыянын согуш кесепетинен башына түшкөн оор кайгысы аркылуу бүткүл элдин муңун чагылдырган. Бул чыгарма Кыргыз драма театрында 500дөн ашуун жолу коюлган. Бексултан Жакиевдин адам турмушунун ар кыл жагдайларына арналган чыгармалары: “Миң кыял” (1964), “Алтын аяк” (1967), “Өкүм” (1972), “Эртең – жаңы жыл” (1975), “Жолугушуу” (1979), “Күттүргөн жаз да келер” (1981), “Саадак какты” (1982), “Жүрөлүчү жүрөк оорутпай” (1989), “Жаза” (1990) жана башка драмалары бар. Бексултан Жакиевдин айрым чыгармалары орус, якут, казак жана башка тилдерге которулган жана чет өлкөлөрдүн театрларында коюлууда. Бексултан Жакиевдин театр, кино, коом жөнүндөгү ой толгоо макалалары гезит-журналдарда жарыяланып турат. Б. Брехттин, С. Михалковдун, М. Ауэзовдун драмаларын кыргыз тилине которгон. Бексултан Жакиев 2000- 2003-жылдары даярдаган кыргыздын манасчылык, төкмөлүк өнөрлөрү ЮНЕСКО тарабынан адамзат рухундагы оозеки мурастын шедеври деп таанылып, Парижде расмий жарыяланып, колдоого алынды. Жакиев III даражадагы Манас ордени, Даңк (1997), Казакстан Республикасынын Астана медалдары менен сыйланган (1999).
БАШКЫ БЕТ
СОҢКУ КАБАР
СУПЕР-ИНФО
SUPER.KG ВИДЕО
МЕДИА-ПОРТАЛ
Кинозал
ЖЫЛНААМА
Суперстан