Жылнаама

26- Январь 1500 -жылы Европалыктар алгачкы жолу азыркы Бразилиянын жээгине барышкан

Испаниялык деңиз саякатчысы Висенте Яньес Пинсон 1499-жылы Түштүк Американын жээгин көздөй бет алган. 1500-жылы 26-январда анын кемеси бороонго калып, азыркы Бразилиядагы Пернамбуку штатынын жээгине барып калган. Жээкке түшкөн Пинсон жана анын кишилери 2 күн бою жергиликтүү жашоочуларды көргөн эмес. Бразилия жергесине Испания падышалыгынын атынан бир нече крест орнотуп, башкарууга өткөн. Пинсон Амазонка, Гвиана жээгин, Ориноко суусун жана Тобаго аралын изилдеп чыккан. Бирок ал ачкан жерлер Тордесил келишимине ылайык, Испаниянын аймагына кирген эмес.

1505-жылы Пинсон Пуэрто-Рико шаарынын губернатору болуп дайындалган. 1508-жылы кайрадан деңизге чыккан. 1523-жылдан кийин ал тууралуу так маалымат жок. Галапагосс архипелагындагы аралга анын жана агасынын урматына ысым ыйгарылган.

Ал эми франциялык окумуштуулар Жан Кузен аттуу франциялык жарандын кемесин 1488-жылы бороон Бразилиянын жээгине чыгарып койгонун айтышат. Кээ бир бразилиялык тарыхчылар португалиялык деңиз саякатчылары 1494-жылдан тарта жашыруун келип турушканын жазышат.