Жылнаама

23- Январь 1994 -жылы "Тамашоучу" Мыктыбек Мукаев туулган

"Позитифф" командасынын оюнчусу жана "Жарайт сити" долбоорунун актёру, Мыкы деген лакап аты менен таанылган Мыктыбек Мукаев Ысык-Көл облусуна караштуу Түп районунун Кең-Суу айылында жарык дүйнөгө келген. Үй-бүлөдө 6 бир тууган. Мыктыбек мырзаны куттуктап байланышканыбызда төмөндөгүлөрдү айтып өттү: "Буюрса, маанай жакшы. Эң алгач "Жарайт сити" долбоорунун балдары күтүүсүз сюрприз кылышып, түнкү саат 12ден өткөндөн кийин куттукташты. Негизи туулган күнгө өтө маани берип деле майрамдабайм. Бүгүн деле достор болуп чогулуп өткөрөбүз го дейм", - дейт тамашоучу. 2012-жылы Кыргыз мамлекеттик техникалык университетинин машина куруу факультетине тапшырып, аны 2016-жылы аяктаган. Ал эми 2011-жылдан тарта күлкү дүйнөсүнө аралашып, университетте окуп жүргөндө орус тилинде өтчү КВНде ойноп баштайт. Кийин кыргыз тилдүү оюндарга катышууну чечип, "Тамашоу" долбоорунун 5-сезонуна "Политех" курама командасы менен чыгат. Кийинки сезондордо ошол учурда тарап кеткен "Позитифф" курама командасын Актан Рыскелдиев менен кайра негиздеп, ойной башташкан. Бирок Мыкыны ТНТ каналындагы "Камеди баттл" шоу берүүсү тааныткан десек туура болот. Анда Мыкы жарым финалына чейин жетип, калың элге таанылган. Мыктыбек Мукаев 2018-жылы "Эң Мыкы шоу" аттуу көңүл ачуучу көрсөтүүсүн негиздеген. "Учурда алдыдагы долбоорлорду ишке ашырууну көздөп, иштеп жүрөм", - дейт тамашоучу.