Жылнаама

5- Октябрь 2008 -жылы Алай районунун Нура айылында 8 баллдык жер титирөө болуп, 75 адамдын өмүрүн алып кеткен

Жекшемби 5-октябрдан 6-октябрга караган түнү кыргыз-кытай чек арасында күчү 8 баллга жеткен жер титирөө болуп өткөн. Жыйынтыгында, Алай районуна караштуу Нура айылы зилзаланын очогуна кабылган. Миңге жакын адам жашаган айыл барууга кыйынчылык туудурган тоолуу аймакта, райондун борборунан 180 чакырым алыстыкта жайгашкан.

Жер титирөөдөн 75 адам каза болгон. Мунун 73ү кырсык болгон жерде көз жумса, экөө ооруканадан кайтыш болгон. Каза болгондордун 39у аял, 36сы эркек. Алардын ичинен 41и мектеп жашындагы балдар. Нура айылындагы 135 турак үйү толугу менен талкаланып калган. Болгону, фин стилинде жыгачтан салынган 5 жыгач турак жай жер титирөөгө туруштук бере алган. Көп батирлүү барак тибиндеги үй, фельдшер-акушердик пункт, клуб жана китепкана толугу менен кулабаса да, керектен чыгып калган. Ал эми айылдык мектеп канааттандырарлык абалда болгон. Кыргыз Республикасынын президентинин указы менен 7-октябрь өлкөдө аза күтүү күнү деп жарыяланган.