Жылнаама

1- Ноябрь 2002 -жылы кикбоксчу Али Порсуков өлтүрүлгөн

Улуту кумык болсо да, кыргыз туусун дүйнөлүк ири мелдештерде даңазалап жүргөн кикбоксчу Али Порсуков өлтүрүлгөн. Каргашалуу окуя Бишкекте, Али машыгуудан кийин достору менен жолугушууга баратканда болгон. Аны алдын ала күтүп турган жалданма киши өлтүрүүчү 3 жолу атып, изин жашырып кеткен. Ошол учурда спортчу жалгыз болуп калган. Каргашаны угуп жетип келген клубдаштары аны дароо Республикалык ооруканага жеткиришкен, бирок өмүрүн сактап калуу мүмкүн болгон эмес. 3 октун бири спортчунун дал башына тийген. Спорттон кетүүнү ойлоп жүргөн Порсуковдун Дагестандан Бишкекке келгенине 3 эле күн болгон. Окуядан кийин Алинин кылмыштык топтордун ортосундагы териштирүүдө курмандык болуп калгандыгы тууралуу маалыматтар тараган.

Кикбокс сүйүүчүлөр жана профессионалдар арасында Дүйнөнүн 2 жолку чемпиону, Азиянын жана Евразиянын чемпиону, Дүйнө кубогунун ээси, Кыргыз Республикасынын Эмгек сиңирген спорт чебери, кикбоксчу Порсуков Али Акбарович 1969-жылы 1-апрелде Дагестан Республикасынын белгилүү спортчулар чыккан Хасавюрт районунун (эркин күрөш боюнча бир нече жолку Олимпиада чемпиондору – бир тууган Сайтиев жана Батировдор да дал ушул райондун кулундары болуп саналышат) Аксай айылында туулуп-өскөн. Үй-бүлөдө 2 эле бир тууган болуп, иниси экөө бирге чоңоюшкан. Социалисттик Эмгектин 2 жолку Баатыры Акбар Порсуковдун үй-бүлөсүндө өскөн. Анын жашынан эле мыкты тарбия алып, спортко жакын болуп чоңойгондугу айтылып келет.