Жылнаама

8- Декабрь 1980 -жылы Британиялык музыкант, коомдук ишмер Жон Леннон каза болгон

Атактуу британиялык ырчы жана музыкант Жон Леннон күйөрманы тарабынан өлтүрүлгөн.Жон Уинстон Леннон 1940-жылы 9-октябрда Улуу Британиянын Ливерпуль шаарында төрөлгөн. Мектепте окуп жүргөндө карикатура тартып журнал чыгарып, мектеп хорунда ырдаган.1956-жылы 16 жашында "Quarrymen" аттуу топ ачып, эл алдында ырдоого өтөт. 1957-жылы музыкант Пол Макартни менен таанышып, аны өзүнүн тобуна чогуу ырдоого чакырат. 1958-жылы Леннондун апасы жол кырсыгына кабылып, каза болгон. 1959-жылы "Quarrymen" тобу тарап,ордуна "The Beatles" тобу түзүлгөн.

1963-жылы аталган топ Европа элине атагы чыгып, бир жылдан соң дүйнө жүзүнө таанылып, атактуулукка жеткен. Жон Леннон топтун лидери аталып, 1964-1965-жылдары китеп чыгарып, анда көркөм ырларды жана кара сөз түрүндөгү чыгармаларды жазган.

1963-жылы ырчы Синтия Пауэлл аттуу кызга баш кошуп, уулдуу болот. 5 жылдан соң Леннон Синтия менен ажырашып, сүрөтчү Йоко Оного үйлөнөт. 1969-жылы "Согуш бүтөт, эгер сен кааласан" аттуу концертин өткөргөн. Ал эми 1971-жылы Ж.Леннон "Imagine" аттуу ыр жыйнагын чыгарып, андагы ырларда ал утопиялык кыялдарын чагылдырган. 1970-жылы ырчы жубайы Йоко Оно менен иштешүү үчүн "The Beatles" тобунан кетип, түгөйлөр "Plastic Ono Band" тобун түзүшөт. 1970-1980-жылдар аралыгында бир нече ырларды жаздырышат.

1975-жылы экөөнүн ортосунда бала төрөлүп, Нью-Йорк шаарына көчүп барышат. Ошол мезгилден тарта Ж.Леннон музыка дүйнөсүнөн кеткен. 1980-жылы 8-декабрда Ж.Леннон АКШнын психикалык жактан оорулуу жараны Марк Чэпмен тарабынан атылып өлтүрүлгөн."The Beatles" тобунун жана Ж.Леннондун ырлары ушул күнгө чейин дүйнө элинин жүрөгүнүн түпкүрүнөн орун алып, байма-бай ырдалып келет.