Жылнаама

27- Декабрь 1971 -жылы Орусиялык актёр жана режиссёр Сергей Бодров төрөлгөн

Орусиялык сценарист, режиссер Сергей Бодровдун уулу Сергей Бодров Москвада төрөлгөн. Ломоносов атындагы МГУнун тарых факультетин бүтүрүп, өз кесиби менен кетпей журналист, жан сакчы болуп эмгектенген. 1995-жылы атасы "Кавказ туткунун" тартууга Дагестанга жөнөөрдө Сергей болбой атасын ээрчип алган. Ал жерден атасы ага башкы каармандын ролун сунуштап, Сергей Бодровдун кинодогу алгачкы дебюту башталган. "Кавказ туткунуна" тартылып жаткан кезинде Алексей Балабановдун көзүнө чалдыгып, ал болочоктогу актёрду "Брат" (Ага) деген тасмага тартылууну сунуштаган. 1996-жылдан 1999-жылга чейин Сергей Бодров ОРТнын "Взгляд" (Көз-караш) телеберүүсүн алып барып, ал жерден өмүрлүк жары Светлана Михайловага жолугат. Экөө 1997-жылы баш кошуп, бир жылдан кийин Ольга аттуу кыздуу болушкан. Сергей Бодров көчкүнүн астында калаардан бир ай мурда Саша деген уулу төрөлгөн.

Кино жаатында бир топ эле таанылып калыптана баштаган кезде 2002-жылы Сергей Бодров "Связной" деген тасманы Осетиядагы окуяга байланыштырып тартмай болот. Өзү башкы каармандын ролун аткарып, ошол эле учурда режиссёр да болуп, кинонун сценарийин да жазган Сергей Бодров 19 кишини алып Кавказга аттанат. Отуз жаштагы актёр кино тартууга Кармадон капчыгайына киреберээрде 150 метр муз каптап, адамдар дайын оту менен жоголгон. Муз каптап калгандардын сөөгүн издөөгө коопсуздук кызматында иштегендер күнү-түнү издешсе да кырсык болгон жерден эч кимиси табылган эмес. Апасы Валентина Бодрова туугандарынын каршы чыкканына карабай коопсуздук кызматында иштегендер менен чогуу Кавказга барган. Он жети адамдын сөөгү табылып, анын ичинен Бодровдуку кездешкен эмес. Уулунун сөөгү табылбаганына деми суубай, жүрөгү ооруган эне эки жумадан ашык реанимацияда жаткан. Арадан алты жыл өтүп, "Сергей Бодровдун сөөгү табылды" деген маалымат көпчүлүктүн кулагын түргөн. 30-35 жаштагы адамдын сөөгүн чогултушуп экспертизадан өткөргөн адистер табылган сөөктөр Сергей Бодровго таандыкпы же жокпу так айтуудан алыс болушкан. Ушул күнгө чейин табылган сөөк Бодровдукубу же башканыкыбы так аныкталбай келет.