Жылнаама

14- Ноябрь 1963 -жылы Орусиялык ырчы, актриса жана телеалпаруучу Лолита Милявская төрөлгөн

Орусиялык ырчы, актриса, режиссер жана телеалпаруучу Лолита Милявская 1963-жылы 14-ноябрда Батыш Украинанын Мукачево шаарында музыканттардын үй-бүлөсүндө төрөлгөн. Апасы Алла Микифорова джаз ырчысы, атасы Марк Горелик дирижёр болгон. 1985-жылы Лолита Москва мамлекеттик институтунда режиссёрдун окуусун окуп бүтүргөн. Андан соң Одесса филармониясында актрисалык кесибин баштап, ал жерден актёр, музыкант Александр Цекалого кезиккен. Музыкант менен бирге “Кабарэ-дуэт” долбоорун иштеп чыккан. Экөөнүн дуэти популярдуулукка жетип, үйлөнүшкөн. 1999-жылы экөө Ева аттуу кыздуу болушат. Кийин бул түгөй “ТВ пицца”, "Таңкы почта" (“Утренняя почта”) көрсөтүүлөрүн даярдап, эфирге алып чыккан. 12 жыл чогуу жашап иштешкенден кийин ортодогу түшүнбөстүктөрдүн айынан Александр менен Лолита ажырашып, Лолита теледен бир топко жоголуп кеткен. 2000-жылы жеке карьерасын баштоого күч топтоп, телеалпаруучулук кесипти баштаган. 38 жашка келгенде атак-даңктын туу чокусуна жеткен. Көптөгөн ыр жыйнактарын жаздырууга, барктуу журналдардын биринчи бетине чыгууга жетишкен. 2005-жылдын август айында Лолита “Биринчи каналдын” эфирине "Комплекстерсиз" (“Без комплексов”) шоу-көрсөтүүсү менен чыккан. Ал эми 2006-жылдын кышкы сезонунда Александр Цекало менен бирге "Кош жылдыз" (“Две звезды”) музыкалык программасын алпарган. 2012-жылы Лолита Николай Басков жана Андрей Данилко менен бирге белгилүү "Алтынчы күнү кечинде" («Субботний вечер») программасын алып бара баштаган. 2013-жылы "Forbes" журналы Лолита Милявскаяны эң бай 20 орус музыканттарынын катарына киргизген.

Жеке жашоосу

Студент кезинде Лолита Александр Беляев аттуу мырзага баш кошуп, 1 жыл жашаган соң ажырашып кеткен. Кийинчирээк Виталий Милявский менен таанышып, бирок экөөнүн ортосундагы мамиле дагы көпкө узаган эмес. 1987-жылы ырчы Александр Цекалого турмушка чыгып, 12 жыл өткөн соң ажырашкан. 2010-жылы Л.Милявская орусиялык теннисчи Дмитрий Иванов менен баш кошуп, ал акыркы сүйүүсү экендигин элге жарыялаган.