Жылнаама

11- Январь 1926 -жылы акын Мукамбеткалый Турсуналиев туулган

Кыргыз басма сөз кызматына эмгеги сиңген таланттуу акын Мукамбеткалый Турсуналиев Чүй районундагы "Алчалуу" колхозунда туулган. Ал 1944-1950-жылдары Советтик Армиянын катарында кызмат өтөп,1952-жылы Кыргыз мамлекеттик университетинин филология факультетине кирген.

Мукамбеткалый Турсуналиев 1954-1957-жылдары "Кыргызстан пионери" гезитинде бөлүм башчы, жооптуу катчы болуп эмгектенсе, 1957-1986-жылдар аралыгында "Чалкан" журналында алгач кызматкер, кийин бөлүм башчы, андан соң жооптуу катчы болуп иштеген. Ал эми 1986-1987-жылдары "Чүй баяны" гезитинде бөлүм башчы кызматын аркалаган.

М.Турсуналиевдин ырлары 1950-жылдан тарта жарык көрө баштаган. Ал көбүнчө сатира, юмор жанрында иштеп, чыгармалары "Крокодил", "Огонёк" ж.б. журналдардын беттеринен жарык көргөн. Орус сатирачылары Крыловдун, Маршактын, Михалковдун, Семёновдун айрым чыгармаларын кыргыз тилине которгон. 1962-жылы СССР Жазуучулар союзунун мүчөсү болгон.

М.Турсуналиев "1941-1945-жылдардагы Улуу Ата Мекендик согушта каармандык эмгеги үчүн", "Советтик Армиянын 50 жылдыгы" ж.б. медалдары, Кыргыз ССРнин Жогорку Советинин президиумунун грамоталары менен сыйланган.