Жылнаама

24- Октябрь 2007 -жылы Журналист Алишер Саипов өлтүрүлгөн

Бул күнү саат 19:00дө Ош шаарында, күбөлөрдүн айтуусунда, кара машинадан үч адам чыгып Алишер Саиповго ок чыгарышкан да, көз ачып-жумганча жок болуп кетишкен. Өлөрүнө эки күн калганда Алишер досторуна: ”Менин артымдан атайын кызматтын (спецслужба) адамдары ээрчип жүрүшөт. Ал тургай менин башым үчүн 10 миң доллар сайылганын телефон аркылуу айтышты. Бирок мен үчүн Кыргызстандан артык коопсуз жер жок”,- деп айткан.

Алишер өзбек тилиндеги “Саясат” гезитинин башкы редактору, “Америка үнү” радиостанциясынын кызматкери, “Фергана” маалымат агенттигинин кабарчысы болгон. Өзбекстан бийлигин сындаган “Саясат” гезитинде 2005-жылы Андижанда болуп өткөн кан төгүлүү, бийликтин кемчиликтери, өлкөдө болуп жаткан окуяларды жаап-жашырбай көрсөткөн. Алишер ошондой эле өзбек түрмөлөрүндөгү адам чыдагыс жашоону, Кыргызстандагы өзбек качкындары, президенттикке ат салышуу тууралуу таасын макалаларын жарыялаган.

Алишер Саиповдун ысымы Вашингтондогу "Журналистика музейиндеги" эстелик тактага түшүрүлгөн. Кыргыз өлкөсүндө өз ишин мыкты аткарган жаш журналисттерге жыл сайын анын атынан атайын сыйлык берилип келет.