Жылнаама

22- Июнь 1947 -жылы Советтик актриса Наталья Варлей төрөлгөн

Айтылуу “Кавказ туткуну же Шуриктин жаңы окуялары” тасмасында мыкты роль жараткан советтик актриса Наталья Варлей Румыниянын Констанца шаарында төрөлгөн. Анын балалыгынын алгачкы жылдары Мурманск шаарында өткөн. Жаштайынан таланттуу, музыкага жакын өскөн Наташа үй-бүлөсү менен 3 жашында Москва шаарына көчүп келишкен. 1965-жылы Наталья Варлей Цирк өнөрү жана эстрадалык маданият орто окуу жайын бүтүрүп, Москвалык цирктин труппасына кошулуп, эквилибристка болуп иштеген.

Наталья Варлей 19 жашында Леонид Гайдайдын “Кавказ туткуну же Шуриктин жаңы окуялары” тасмасына тартылып калган. Тасманын бет ачаар аземи 1967-жылдын 1-апрелинде болгон. Ошондон баштап Варлейдин атак-даңкы алыска кеткен. Ал эми 1967-жылдын октябрь айында К.Ершовдун жана Г.Кропачевдун "Вий" деген фильмине башкы каармандын образын ойноп тартылган. Ал тасма Совет киносундагы алгачкы тартылган коркунучтуу фильмдердин катарына кирген. Актриса баш-аягы 28 фильмге тартылган.