Жылнаама

20- Октябрь 2005 -жылы Жогорку Кеңештин экс-депутаты Тынычбек Акматбаев көз жумган

ЖКнын депутаты Тынычбек Акматбаев №31-колонияда чыккан көтөрүлүштү басаңдатуу максатында ал жакка жол алган. Бирок көтөрүлүшчүлөр андан бетер чыр чыгарышып, кандуу жаңжал коштогон атышуу башталган. Атышууда ок Тынычбек Акматбаевге тийип, ал менен бирге анын үч жансакчысы да каза болгон.

Маркум кримавторитет Рысбек Акматбаевдин иниси, ЖКнын экс-депутаты Тынычбек Акматбаев 1962-жылы 30-январда Ысык-Көл областына караштуу Чолпон-Ата шаарында төрөлгөн.

Тынычбек Акматбаев 1983-жылы Фрунзе шаарындагы советтик соода техникумун, 1993-жылы Кыргыз Улуттук университетинин экономика факултетин бүтүргөн.

1984-1992-жылдары Ысык-Көлдүн жээгинде жайгашкан эс алуучу жайларда ашпозчу, технолог, сатуучу болуп иштеген. Ал эми 1992-1997-жылдары жеке ишкерлик менен алектенген. 1998-жылы Чолпон-Атада Төрөгелди атындагы асыл тукум жылкы заводун ачкан.

Тынычбек Акматбаев 2005-жылы март айында 3-чакырылыштагы Кыргыз Республикасынын Жогорку Кеңешинин депутаттыгына шайланган.