Жылнаама

23- Ноябрь 1875 -жылы орусиялык революционер, жазуучу Анатолий Луначарский төрөлгөн

Орусиялык жазуучу, коомдук жана саясий ишмер, котормочу, публицист, адабият сынчысы Анатолий Васильевич Луначарский Полтавада төрөлгөн.

Швейцарияда Цюрих университетинде окуган. Карл Маркстын, Фридрих Энгельстин жана Рихард Авенариустун эмгектерин окуп, "Религия и социализм" аттуу эки томдук эмгегин чыгарган.

1898-жылы Москвага кайтып, революциялык иштерди баштап, бир жылдан кийин камакка алынып, Полтавага жиберилген. 1903-жылы большевиктер партиясына кирип, 1904-жылы камактан чыккан соң Женевада большевиктер гезитинин редактору болгон. Ленин, Богданов менен жакындашып, 1905-жылы Москвага кайтып, "Новая жизнь" гезитинде иштеп, кайрадан камакка алынган.

Швейцарияда жашап, 1917-жылы Февраль революциясы тууралуу угуп, Петроградга келип саясатка аралаша баштаган. 1917-жылдын октябрь айынан 1929-жылдын сентябрь айына чейин РСФСРдин биринчи Агартуу эл комиссары, 1905-1907-жылдардагы революциянын активдүү катышуучусу болгон.

1933-жылы Испанияга СССРдин толук ыйгарым өкүлү болуп кетип, Францияда Ментонада 1933-жылы 26-декабрда каза болгон.