Жылнаама

17- Декабрь 1975 -жылы америкалык актриса жана фотомодель Милла Йовович төрөлгөн

Америкалык актриса жана фотомодель Милла Йовович Украинанын Киев шаарында актриса Галина Логинова менен врач Борги Йововичтин үй-бүлөсүндө туулган. Толук аты-жөнү - Милица (Милла) Наташа Йовович. 5 жашында үй-бүлөсү менен Лондонго, андан кийин Калифорнияга көчүп барышкан. Калифорнияда мурунку врач менен актриса жумуш таппай жүрүп, жөнөкөй үй кызматкерине айланышат. Алар үй-бүлөсү менен белгилүү кинорежиссёр Брайн де Пальманын вилласында кызмат өтөшкөн.

Болочок актриса АКШга келгенде Милица эмес, Милла болуп алган. Ата-энесинин режиссёр Брайндын үй кызматкери болушу Милланын шоу-бизнеске келүүсүнө бирден-бир себеп болгон, анткени режиссёр үйүндө түрдүү кечелерди уюштуруп турчу. Кечеде кызмат кылып жүргөн Милланын сулуулугуна “Prima” моделдик агенттигинин сүрөтчүсү суктанып, бир нече кадр тартып алат. Кийинчерээк ал сүрөттөрдү аталган моделдик агенттиктин менеджери Жефри Даш көрүп калып, кызды тез эле жумушка алууну туура көрөт. Ал кезде Милла 11 жашта гана болгон.

Тез аранын ичинде атактуу моделге айланганы Милланын актриса болуусуна шарт түзөт. Миллага тасмага тартылуу боюнча көптөгөн сунуштар түшө баштайт. Ошентип, анын дебюту 13 жашында “Эки айдын кошулушу” деп аталган эротикалык мелодрамада болгон. Мындан көп өтпөй ал жарым жылаңачтанып “Көгүлтүр көлгө кайтуу” тасмасына тартылат. Албетте, мындай тасмадагы ролу үчүн чоң суммадагы акча төлөнгөн. Ошентип, Йовович 15 жашында эле таанылып, миллион доллар иштеп тапкан.