Жылнаама

16- Декабрь 2009 -жылы Журналист Геннадий Павлюктун Казакстандагы ооруканалардын бирине өтө оор абалда жеткирилгендиги тууралуу маалымат тараган

“Белый пароход” интернет басылмасынын журналисти Геннадий Павлюктун Казакстандагы ооруканалардын бирине өтө оор абалда жеткирилгендиги тууралуу маалымат тараган. Журналист бир апта ооруканада дарыгерлердин көзөмөлүндө эсине келе албай жатып, жарык дүйнө менен кош айтышкан.

Ибрагим Рустамбек аттуу псевдоними менен белгилүү Геннадий Павлюктун денеси 16-декабрда Алматыдагы Фурманов көчөсүнөн орун алган көп кабаттуу үйлөрдүн алдынан табылган. Ошол эле күнү ММКларда журналист алтынчы кабаттан буту-колу байланган абалда ыргытылганы жөнүндө шектүү маалымат тараган. Казакстандын тартип коргоо органдары журналистке кол салуу боюнча кылмыш ишин козгоп, иликтөө иштерин жүргүзгөн. Кыргызстандык укук коргоочулар жана саясатчылар журналисттин өлүмүн анын кесиптик ишмердиги менен байланыштырышкан. Журналисттин сөөгү 24-декабрда Чолпон-Ата шаарында жерге берилген.

Г.Павлюк “Аргументы и факты – Кыргызстан”, “КП в Кыргызстане” гезиттеринде баш редактор болуп иштеп, “Белый пароход” интернет-басылмасында да эмгектенген.