Жылнаама

13- Март 1901 -жылы АКШнын 23-президенти Бенжамин Гаррисон көз жумган

АКШнын 9-президенти Уильям Гаррисондун небереси, “Америка америкалыктар үчүн” принцибине таянган АКШнын 23-президенти Бенжамин Гаррисон 1901-жылы февраль айында грипп болуп ооруп калган. Абалы күндөн күнгө оорлошуп отуруп, пневмония оорусу күчөп кетип, 1901-жылы 13-мартта өзүнүн үйундө 67 жашында көз жумган.

Бенжамин Гаррисон 1833-жылы 20-августта Цинциннатинин алдындагы Огайо суусунун жээгинен орун алган чакан фермердин үй-бүлөсүндө туулган. Огайо штатынын баш калаасы Колумбастагы университетке кирип, андан юристтик кесип алып чыккан. Ал пресвитериандык диний-саясий агым менен кызматташ болгон. Анын таасирин бала чагынан көргөн. Университетте окуп жатканда чиркөөдө дьякон болуп иштеп жүргөн. Коомдук көз карашы республикачыл партияга чукул болгон жана аны менен кызматташ болуп, акыры саясий мансабына да ушул партиянын аркасы менен жеткен.

Жарандык (1862) согуш Гаррисондун тагдырын такыр башка жолго салган. Согуш аяктаганда ал улутка кеңири таанымал бригадалык генерал болгон. Ошондон кийин республикачыл партия аны өзүнүн талапкери кылып көргөзүп, Индиана штатына губернатор кылып шайлаттырган. 1881-жылы ошол эле штаттан сенатор болуп шайланган. Акыры республикачыл партия аны президентти шайлоо маалында өлкөдөгү эң жогорку орунга да талапкер кылып көргөзүп, талапкер марага жеңиш менен келген. АКШнын 23-президенти Бенжамин Гаррисон (1889-1893) бийликте турганда мамлекеттин ички жана тышкы абалы кыйла оор болгон. Андай жагдай мыйзам чыгаруу органдарынын, ошондой эле саясий элита менен лидердин тил табыша албаганынан улам болгон. Анын себеби президент өзү мүчө болгон пресвитериан диний-саясий чөйрө таасиринен улам болгон деп айтышат. Ошондуктан Гаррисонду немис профессору Раймунд Ламмерсдорф "Конгресстин көлөкөсүндө калган президент" деп атаган.