Жылнаама

26- Март 1920 -жылы жазуучу Кусейин Эсенкожоев туулган

Кыргыз адабиятында фантастика жанрына чыйыр салган жазуучу Кусейин Эсенкожоев Жети-Өгүз районунда туулган. Орто мектепти 17 жашында бүтүрүп, Кыргызстан Мамлекеттик педагогикалык институтуна тапшырган. К.Эсенкожоев институттун акыркы курсунда окуп жатканда Алматыдагы офицерлерди даярдоочу согуш мектебине жиберилген. Аны кыска мөөнөттө бүтүрүп чыгып, офицердик наам менен фронтко аттанган. Кусейин Эсенкожоев Москва алдындагы катуу салгылашта 1941-жылы жыйырмадан жаңы ашкан кезинде курман болгон.

К.Эсенкожоев өзүнүн чыгармачылык өмүрүндө "Саякатчы бала", "Үчүнчү шар", "Мекендин уулу" ж.б. балдарга арналган илимий-фантастикалык кызыктуу чыгармаларды жазган.

Ал көп ырларды, поэмаларды, очерктерди, фельетондорду жаратып, көбү бүтпөй калган. К.Эсенкожоевдин котормосу менен Пушкиндин, Лермонтовдун, Маяковскийдин бир нече ырлары кыргыз тилинде чыккан.

Кыргыз адабиятынын тарыхында К.Эсенкожоев кыргыз балдар адабиятынын негиз салуучуларынын бири болгон.