Жылнаама

3- Июль 1996 -жылы Борис Ельцин Орусиянын президенти болуп экинчи мөөнөткө шайланган

Борис Ельцин Орусиянын президенти болуп экинчи мөөнөткө шайланган. Анын бийлигинин тушунда Орусияда эки жолу мамлекеттик төңкөрүш боло жаздап, Чеченстанда эки ирет согуштук аракеттер башталган. Элдин баары 2000-жылды тосууга камданып жатканда, күтүүсүздөн өз бийлигин Путинге өткөрүп берип баса берген Ельцин: "Бүгүн мен силерге акыркы жолу Орусиянын президенти катары кайрылып жатам. Мен чечим кабыл алдым. Ага узак жана татаал ойлордон кийин бардым. Үстүбүздөгү кылымдын акыркы күнү мен кызматымдан кетип жатам", - деген.

Ушинтип 1999-жылдын акыркы күнү бийлигин өз ыктыяры менен өткөрүп берген Ельцин андан бери Москванын четиндеги мамлекеттик дачада бейкапар жашоо сүрүп келген. Ал көптөн бери жүрөк оорусунан жабыр тартып, татаал операция да жасаткан. Ельцин башкарган жылдар Орусия тарыхындагы эң татаал, опуртал учурлардын бири болгон.

Орусиянын алгачкы президенти Борис Ельцин ден соолугу кескин начарлап кетип, 76 жаш курагында 2007-жылы 23-апрель күнү дүйнө салган.