"Кара-Кечеде" каза болгон Айбек Мамбеталиевдин өлүмүнө шектелген эки милиция кызматкери 15 жылга эркинен ажыратылды

"Кара-Кечеде" каза болгон Айбек Мамбеталиевдин өлүмүнө шектелген эки милиция кызматкери 15 жылга эркинен ажыратылды. Тиешелүү чечимди Кемин райондук соту чыгарган. Бул тууралуу бүгүн, 27-февралда Жогорку Соттон билдиришти.

Эске сала кетсек, 2013-жылдын 1-декабрында милиция кызматкерлери Чаек айылынын тургуну А.Мамбеталиевди катуу сабап салышкан. Анын кесепетинен жабырлануучу ооруканага жетпей каза болуп калган. Бул окуя “Кара-Кече” көмүр кенине кире бериш жерде болгон. Прокуратура тарабынан жүргүзүлгөн ыкчам иликтөө иштеринин жүрүшүндө Кочкор РИИБинин кызматкерлери Ж.С., Р.Т. жана Нарын ОИИБинин кызматкери Ч.Б. кылмышка шектелип кармалышкан. Ал эми 2014-жылдын 20-февралында Жумгал районунда алардын соту болуп жаткан учурда баш аламандык чыгып, маркум А.Мамбеталиевдин жакындары күнөөлүүлөрдү жазалоого өтүшкөн. Анын кесепетинен эки милиция кызматкери сабалып, бири сууга ыргытылган.

Автор: Бекжан Рыскулов