Өскөн Даникеевдин 80 жылдыгына арналган иш-чара филармониянын артисттеринин концерти менен коштолду

Салтанат филармониянын артисттеринин катышуусундагы чоң программадагы концерт менен коштолду.

Салтанат Өскөн Даникеевдин чыгармаларынын негизинде тартылган тасма жана пролог менен ачылды.

Кечени Гүлшан Молдоева жана Алмаз Касымалиев алып барышты.

Кыргыз Эл жазуучусу Өскөн Даникеев

Бүгүн, 27-февралда Бишкектеги Т.Сатылганов атындагы Улуттук филармонияда Кыргыз Эл жазуучусу, Токтогул сыйлыгынын ээси, окумуштуу Өскөн Даникеевдин 80 жылдык мааракесине арналган салтанаттуу кече болуп өттү. Бул тууралуу КРнын Маданият, маалымат жана туризм министрлигинен билдиришти.

Иш-чарага КРнын Өкмөтүнүн аппарат жетекчиси Н.Момуналиев, КРнын Маданият, маалымат жана туризм министри А.Максүтов, КРнын Экономика министри Т.Сариев, жазуучулар, акындар катышты.

Салтанат Өскөн Даникеевдин чыгармаларынын негизинде тартылган тасма жана пролог менен ачылып, филармониянын артисттеринин катышуусундагы чоң программадагы концерт менен коштолду.

Маданият министри А.Максүтов куттуктоо сөзүндө: "Өскөн Даникеев 80 жаштын ашуусуна куру кол келбей, бараандуу жүк артынып, кыргыздын адабияты менен маданиятынын өнүгүшү үчүн салмактуу салым менен келди. Бүтүндөй окурман журтчулугунун кыйырына тараган көркөм чыгармалары көпчүлүккө руханий азык болуп бере алды. Замандашыбыз бири-бирине таптакыр коошпогон, бири-бирине окшобогон эки тармакты бирдей ала жүрүп, экөөндө тең зор ийгиликтерге жетишкендиги менен баарыбызга үлгү боло алды. Техника илиминин адиси болсо да, оргуштап аккан булактын оозун баса албаган сыяктуу, көкүрөккө тынчтык бербеген жазуучулук талант акыры адабият ааламына ишенимдүү кадам таштоого жол ачкан. Албетте, окутуучулук ишмердүүлүгү, жаш муунду тарбиялоодо жасаган албан эмгеги өзүнчө орошон сөзгө арзыйт. Философиялык терең ойду камтыган, тарбиялык мааниси зор “Белгисиз тагдыр”, “Көз ирмемдеги өмүр”, “Мурас”, “Көкөй кести” сыяктуу чыгармалары эл оозуна алынып, окурмандын купулуна толуп келет. Буга анын калеминен чыккан повесть жана романдардын сахнага коюлушу, ошондой эле китептердин башка тилдерде жарык көрүшү ачык күбө",- деди.

Автор: Динара Абдыкадырова