Чүй облусунда жыл башынан бери 8 зордуктоо фактысы катталды

Чүй облусунда жыл башынан бери 8 зордуктоо фактысы катталды. Бул тууралуу бүгүн, 12-мартта Чүй облустук ички иштер башкы башкармалыгынан билдиришти.

Маалыматка ылайык, 2 ай аралыгында Чүй облусунун аймагында катталган 8 зордуктоо фактысынын ичинен 6 кылмыштын бети ачылган. Ал эми былтыр алгачкы 2 ай аралыгында 13 зордуктоо катталып, анын 12синин бети ачылган. Ошондой эле жыл башынан бери 14 адам өлтүрүү фактысы катталып, 12 кылмыштын бети ачылган. Ден соолукка атайылап зыян келтирүү боюнча 12 факт катталып, 9 иштин бети ачылып, кылмыштардын бетин ачуу 75 пайызды түздү. Каракчылык боюнча 27 факт катталып, 24 кылмыштын бети ачылган.

Автор: Мальвина Уметбекова