Бишкекте Улуттук сүрөтчүлөр академиясынын бүтүрүүчүлөрүнүн көргөзмөсү ачылды

Улуу Ата Мекендик согуштун Республикалык ардагерлер кеңешинин төрагасы Тарас Токомбаев

Бүгүн, 23-апрелде Гапар Айтиев атындагы Кыргыз улуттук көркөм сүрөт музейинде Тургунбай Садыков атындагы Улуттук сүрөтчүлөр академиясынын бүтүрүүчүлөрү “7 өң” деген аталыштагы көргөзмөсүнүн ачылышын өткөрүштү. Иш-чаранын бет ачарына Улуу Ата Мекендик согуштун Республикалык ардагерлер кеңешинин төрагасы Тарас Токомбаев жана бир катар маданият ишмерлери катышты.

Белгилүү Эл сүрөтчүсү Догдурбек Нургазиевдин 7 окуучусунун бири жана бүгүнкү көргөзмөнүн уюштуруучусу Советбек Аманов сүрөт көргөзмөсүнө жалпысынан 97 эмгек коюлгандыгын белгиледи.

“Тургунбай Садыков атындагы Улуттук сүрөтчүлөр академиясын биздин тайпадан 7 бала бүтүрдүк, ошондуктан биргелешкен бул көргөзмөнү “7 өң” деп атоону чечтик. Анткени ар бирибиздин тартуу стилибиз ар башка, өзүңөр байкагандай, бирөөбүз портрет жанрын жакшы көрсөк, башкабыз жаратылышка жан тартып турабыз. Быйыл күзүндө дагы бир көргөзмө уюштурсакпы деп турабыз, бул жерге, тилекке каршы, бардык эмгектерибиз баткан жок. Болгону үчтөн бир бөлүгү эле. Ал эми бул экспозиция 9-майга чейин уланат”,- деди сүрөтчү.

Автор: Наргиза Бекжанова
Фото: Наргиза Бекжанова