"Кыргыз мамлекети экономиканы өнүктүрүүдө Швейцариянын тажрыйбасын өздөштүрүүдө" деди Жоомарт Оторбаев

29-апрелде премьер-министрдин милдетин аткаруучу Жоомарт Оторбаев Швейцариянын Улуттук банкынын төрагасы Томас Йордан менен жолугушту.

Жолугушууда Оторбаев Швейцария тарапка өлкөнү өнүктүрүүдөгү жана биргелешкен долбоорлорду ишке ашыруудагы көрсөткөн колдоосу үчүн ыраазычылык билдирип: "Кыргыз мамлекети демократиялык процесстерди уюштурууда, экономиканы өнүктүрүүдө, калкты социалдык жактан колдоо жаатында Швейцариянын тажрыйбасын өздөштүрүүдө",- деди.

Томас Йордан Швейцария жана кыргыз өлкөсүнүн Улуттук банкы узак мөөнөттүү терең байланыштарга ээ экенин белгиледи. "Биз мындан ары дагы кыргыз мамлекети менен тыгыз кызматташууну улантууга ниеттенүүдөбүз",- деп кошумчалады ал.

Тараптар банктык жана каржылык тармактагы эки тараптуу кызматташууну тереңдетүү, биргелешкен долбоорлорду ишке ашыруу, кыргыз өлкөсүнө инвестиция тартуу жана туризмди өнүктүрүү маселелерин да талкуулашканын өкмөттөн билдиришти.

Автор: Автандил Добулбеков