Жогорку Кеңеш "Такси" белгиси жок иштеген таксисттерди 3-10 миң сом айып пул төлөөгө милдеттендирди

Жогорку Кеңеш 6-майдагы жыйынында такси кызматынын ишмердүүлүгүн тартипке салууга багытталган мыйзамды жактырды. Долбоорго 80 депутат "макул", 2 депутат "каршы" деп добуш берди.

Документке ылайык, жүргүнчүлөрдү жана жүк ташуу боюнча кызматтарды көрсөтүү үчүн пайдаланылган жеңил автомобилде жеңил таксини билдирген айырмалоо белгилеринин жок болгону үчүн айдоочуга 3000 сомдон 10 миң сомго чейин администрациялык айып салынат (физикалык жактарга 3 миң сом, кызматтык адамдарга 5 миң сом, юридикалык жактарга 10 миң сом).

Мындан тышкары эл аралык жана шаарлар аралык ташуу жеңил такси аркылуу унаа бекеттеринин же унаа станцияларынын аймагынан жүргүзүлбөсө, айдоочуга 3000 сомдон 10 миң сомго чейин администрациялык айып каралды (физикалык жактарга 3 миң сом, кызматтык адамдарга 5 миң сом, юридикалык жактарга 10 миң сом).

Автор: Нургазы Аматов