Алмазбек Атамбаев Улуттук гвардиянын жаңы түзүлгөн 708-аскер бөлүгүнүн күжүрмөн туусун тапшырды

Бүгүн, 20-июлда президент Алмазбек Атамбаев Улуттук гвардиянын жаңы түзүлгөн 708-аскер бөлүгүнүн күжүрмөн туусун тапшырды. Ошондой эле өлкө башчы аскер кызматкерлерин Улуттук гвардиянын 23 жылдыгы менен куттуктап, эң мыкты 10 аскерге көп жылдык күжүрмөн кызматы үчүн алтын сааттарды ыйгарды.

“Улуттук гвардия - ар бир өлкөдө эркиндиктин жана мамлекеттин символу. Ошондуктан Улуттук гвардияда кызмат кылуу - ар бир жоокер үчүн сыймыктуу иш. Акыркы кезде мамлекет куралдуу күчтөргө мамилени түп-тамырынан бери өзгөрткөн, армиябыздын күч-кубатын арттырууга бардык аракеттер көрүлүүдө. Аскер кызматкерлеринин эмгек акысы барган сайын көтөрүлүп, үйлөр курулуп, четинен берилип жатат.

Аскердик реформалар жүрүүдө. Аскердик техника, керектүү курал-жарактар менен да камсыздалды. Акыркы жылдардан бери миң тоннадан ашык курал-жарак келди. Мындай кадамдар мамлекетибиздин коопсуздугун арттырат”,- деди президент.

Айта кетсек, Аскер бөлүгү Чүй облусунун Аламүдүн районунда, АКШнын мурунку аскердик базасында жайгашкан. Расмий түрдө 2014-жылы 24-декабрда ачылган.

Автор: Наргиза Бекжанова
Фото: Наргиза Бекжанова