Өзүн-өзү асып өлгөн аскердин энеси уулунун чөнтөгүнөн табылган катты бирөө жазган деп айтууда

Бүгүн, 27-февралда Бишкекте өзүн-өзү асып каза болгон аскердин энеси Кайыргүл Канаталиева журналисттер менен жолугушуу өткөрдү. “Балам катты өз колу менен жазган эмес. Ал мындай ишке барбайт болчу”,- дейт эне. Канаталиева мугалим экендигин жана өз уулуна 1-класстан 11-класска чейин сабак бергендигин айтып, табылган каттагы кол жазма уулунун кол жазмасы эмес экендигин айтты. Эске салсак, 16-февраль күнү Бишкек шаарында аскердик милдетин өтөп жаткан жоокер Эркинбек уулу Эрлан өзүн-өзү асып каза тапкан. Окуя болгон күнү анын чөнтөгүнөн кат табылгандыгы айтылган. Ал катта аскер өз өмүрүн кыйгандыгы үчүн жакындарынан кечирим сураган.

Автор: Мээрим Жеңишбек кызы