Нарын районунда сел жүрүп, бир нече үй зыянга учурады (фото)

Нарын районунун Чет-Нура айыл аймагындагы Орто-Саз айылында 3-августта болжол менен саат 22:00дөн 23:30га чейин нөшөрлөп жааган жамгырдын кесепетинен Чоң-Кара-Коо жана Кичи-Кара-Коо коктуларынан 10-15 мүнөт сел жүргөн. Бул тууралуу Өзгөчө кырдаалдар министрлигинин маалымат кызматы билдирди.

Натыйжада Кара-Коо коктусунда жайгашкан мал сарайдын жанына жыйылган 4 тонна чөптү толугу менен агызып кеткен. Сел Нарын-Ийри-Суу унаа жолундагы көпүрө түтүгүнө батпай унаа жолдун үстү менен агып, 20 турак жайга, анын ичинен 5 турак жайдын жер төлөлөрүнө кирген жана 1 бала бакчанын короосун каптаган.

Аткарылган иш-чаралар: Нарын шаардык өрт-куткаруу кызматынан 32 куткаруучу, суу сордуруучу мотопомпа, айыл аймагынан 16 ыктыярдуу куткаруучу, Нарын райондук жарандык коргонуу комиссиясы тарабынан 1 жүктөгүч тартылып, кырдаал жөнгө салынды.

Ошондой эле Байгазак айылында сел айылдын түндүк-батыш тарабындагы Кара-Коо коктусунан келип, 14 турак жайды, короосун каптаган жана 3 турак жайдын ичине, жер төлөлөрүнө чейин кирген.

Аткарылган иш-чаралар: Нарын шаардык өрт-куткаруу кызматынан 8 куткаруучу, айыл аймагынан 6 ыктыярдуу куткаруучу ишке тартылып, башкармалык тарабынан 150 кап кум бөлүнүп берилди.

Жан-Булак айыл аймагындагы Нарын-Ак-Тал-Чат-Баетов унаа жолунун 25-чакырымында сел жүрүп, унаа жолдун 30-35 метр аралыгын сел калдыктары каптаган.

Аткарылган иш-чаралар: Унаа жолдогу сел агындыларын тазалоого райондук ЖЭМ №8-транспорт кызматы тарабынан 1 жүктөгүч тартылып, кыян сууларынан келген шиленди кум-баткактарды унаа жолунун үстүнөн тазалоо жумуштары уланууда.

Ыкчам топ, ЖЭМ №8-транспорт кызматы тарабынан 2 адам, айыл өкмөтүнөн 4 адам (баары 10 адам) түзүлгөн кырдаалдын кесепеттерин жоюу боюнча иштерди уюштурууда.

Жарандык коргонуу комиссиясы учурда айдоо аянттарына келтирилген зыяндарды тактоо боюнча иш алып барып жатат.

Автор: Жамалидин Парманкулов