Бишкекте 3 унаанын катышуусунда жол кырсыгы катталды

Бүгүн, 18-август күнү саат 9:30 чамасында Бишкектин Фрунзе жана Исанов көчөлөрүнүн кесилишинде 3 унаанын катышуусунда жол кырсыгы катталды. Окуянын күбөлөрү Исанов көчөсү менен түштүк тарапка катуу ылдамдыкта бараткан Фольксваген Венто үлгүсүндөгү жеңил унаанын айдоочусу жол чырактын кызыл жарыгы күйгөнүнө карабай өткөнүн айтышууда. Анын жыйынтыгында Фрунзе көчөсүндө келаткан Мерседес үлгүсүндөгү унааны, андан соң жол боюнда токтоп турган Опель Астра үлгүсүндөгү унааны сүзгөн. Бактыга жараша, кырсыктан эч ким жаракат алган жок. Жабырлануучулардын экөө тең таксисттер.

Атын атагысы келбеген Мерседес унаасынын айдоочусу окуя тууралуу: "Жол чырактын жашыл жарыгы күйгөнүнөн жаңы эле ордумдан жылып бараткам. Аңгыча капталымдан Фольксваген Венто унааасы зуулдап келип сүздү да, андан кийин жол жээгинде турган башка унааны сүздү. Фольксвагендин айдоочусу жаш жигит экен, унааларды калыбына келтирип берем деп жатат. Дагы жакшы, жолдун боюнда жөө адамдар жок болчу. Бирөө-жарым болсо эмне болмок эле?"- деди.

Автор: Асхат Субанбеков