Келдибековго козголгон кылмыш ишиндеги бир эпизод гана кыскарды, башка эпизоддор боюнча соттук териштирүүлөр уланууда

Жогорку Кеңештин экс-төрагасы Ахматбек Келдибековго козголгон кылмыш ишиндеги бир эпизод гана кыскарды, башка эпизоддор боюнча соттук териштирүүлөр уланууда. Бул тууралуу бүгүн, 18-августта Жогорку Соттун басма сөз кызматы жарыялады.

"Бишкек шаарынын Биринчи Май райондук сотунун маалыматы боюнча, иштин материалдарына ылайык, соттолуучулар А.Келдибеков Социалдык фонддун төрагасы, ал эми Б.Аманалиева анын орун басары болуп турганда "Ротак-Бишкек" жоопкерчилиги чектелген коомунун директору менен алдын ала кылмыштуу көмүскө бүтүмгө келишип, 2004-жылдын 12-ноябрында өлкө жарандарынын камсыздандырылган өздүк камсыздандыруу эсептеринен көчүрмө бөлүктөрдү ачуу боюнча кызмат көрсөтүү жөнүндө жана камсыздандырылган адамдардын даректери көрсөтүлгөн конверттерге таңгактоо боюнча 2009-жылдын 31-декабрына чейин бир көчүрмө бөлүктү 7,33 сом баада, сынактык тооруктарды өткөрбөстөн, ашыра көтөрүлгөн баада келишим түзүшкөн.

Соттолуучулар А.Келдибековго жана Б.Аманалиевага тагылып жаткан кылмыштар 2004-жылдан тарта 2005-жылдын 13-январына чейин жасалган. Бул кылмышты жасагандан тарта он жылдан ашык убакыт өткөн.

2015-жылдын 17-августунда Бишкек шаарынын Биринчи Май райондук соту А.Келдибековго карата жазык иши боюнча жогоруда көрсөтүлгөн эпизод боюнча өндүрүштү эскирүү мөөнөтүнүн өтүшүнө байланыштуу кыскартты.

Тергөө органдары тарабынан А.Келдибеков бир нече эпизоддор боюнча айыпталып жаткандыгын белгилеп кетүү зарыл. Сот эпизоддордун бири гана боюнча жазык ишин кыскартты. Ал эми башка эпизоддор боюнча соттук териштирүүлөр уланууда. Кийинки сот отуруму 2015-жылдын 18-августуна белгиленди",- деп билдирет Жогорку Сот.

Автор: Нургазы Аматов