"Вечерний Бишкек" гезитинин сайты окурмандары менен коштошту

Кыска мөөнөт ичинде Кыргыз Республикасындагы эң окумдуу сайттардын бирине айлана алган "Вечерний Бишкек" гезитинин сайтынын командасы 26-августта окурмандары менен коштошуп жатканын жарыялады. Мындай абалга акыркы айларда аталган басылманы бийлик, тактап айтканда, сот жана президентке жакын адамдар 2010-жылдан бери болуп көрбөгөндөй жапырт төө бастыга алышканы жеткиргени айтылды.

Албетте, басылманын макалалары бирөөгө жакканы менен, башка бирөөгө жакпашы мүмкүн. Ал эми эркин өлкөдө ар бир жарандын кимге ишенип, кимге ишенбөө укугу бар. Ал деген тандоо эркиндиги. Тандоо эркиндигинин негизги бөлүгү - бул сөз эркиндиги. Бийликтин же бийликке ымалалаш күчтөрдүн сөз эркиндигин чектөө, аны көзөмөлгө алуу аракети демократиянын эң негизги принциби - тандоо эркиндигине болгон чабуул. Тандоо эркиндиги жок жаран - кул.

Бийликтин өз элин кулга айлантуу аракети жакшылыкка алып келбесин тарых ар дайым далилдеп келет.

Ал эми жогорудагы басылма туш болгон кырдаал тууралуу айтсак, мурдагы бийлик тушунда "ыңгайсыз" сүйлөгөндөрдү коркутуп, өлтүргөнгө чейин барышкан болсо, азыр миллиондогон суммага доого жыгуу менен "абасын буумай" жолуна түшүштү. Азырынча...

Автор: Эркин Түмөнбаев