Быйыл бүт булактардан алынган мамлекеттик инвестициялардын бюджеттик каржылоосу 26 миллиард сомдон ашты

2015-жылы бүт булактардан алынган мамлекеттик инвестициялардын бюджеттик каржылоосу 26 миллиард 383,7 миллион сомду түзөт. Муну бүгүн, 19-ноябрдагы маалымат жыйынында каржы министринин орун басары Мирланбек Байгончоков билдирди. Анын айтымында, зайымдардын жана гранттардын эсебинен тышкы каржылоонун үлүшү 25 миллиард 759,1 миллион сомду же каржылоонун жалпы суммасынын 97,6 пайызын түзөт. Ал эми долбоорлорду кошо каржылоого бул сумманын 2,4 пайызы жумшалат.

"Ушул тапта экономиканын ар кыл секторлорунда, анын ичинде билим берүү, саламаттыкты сактоо, транспорт, айыл чарба жана энергетика тармактарында, 68 мамлекеттик инвестициялар долбоору ишке ашырылып жатат.

Ошондой эле 2015-жылы бюджетти колдоого программалык гранттардын жана насыялардын алкагында эл аралык каржы институтунан 160,4 миллион АКШ доллары өлчөмүндө каражатты тартып келүү пландалууда. Бул сумманын 57,6 миллион доллары – насыялык жардам, 102,8 миллион доллары – гранттык жардам.

2015-жылдын башынан тартып бүгүнкү күнгө чейин бюджетти колдоого 137,1 миллион АКШ доллары өлчөмүндө каражат келип түштү, анын 41,2 миллион доллары – насыя, 95,9 миллион доллары – грант",- деди Байгончоков.

Автор: Наргиза Бекжанова