Карганбек Самаков, Игорь Чудинов, Курманбек жана Жаныш Бакиевдер боюнча кылмыш иши сотко жөнөтүлдү

Башкы прокуратура 2008-жылы Байтик, Лебединовка жана Кара-Жыгач айыл өкмөттөрүндөгү жер тилкелерин "Айыл чарба багытындагы жерлер" категориясынан "Калктуу конуштардын жерлери" категориясына которуу фактысы боюнча кылмыш ишин тергөөнү аяктады. Бул тууралуу аталган мекеменин басма сөз кызматы жарыялады.

Маалыматка ылайык, тергөөнүн жыйынтыгында Карганбек Самаковго карата "коррупцияны уюштуруу", Жаныбек Бакиевге жана Курманбек Бакиевге карата "коррупцияга көмөктөшүү", К.Самаковдун уулу Кубанычбек Самаковго жана алардын 4 адамына карата "коррупцияны кошо аткаруучулук" беренелери боюнча айыптар тагылды.

Мындан тышкары өкмөттүн "КРнын Аламүдүн районунун аймагындагы жерлерди которуу жөнүндө" мыйзамсыз токтомун чыгарганы үчүн мурунку премьер-министр Игорь Чудиновго, мурунку биринчи вице-премьер-министр И.Айдаралиевге жана мурунку айыл чарба министри А.Ногоевге карата "кызматтык абалынан кыянаттык менен пайдалануу" беренеси боюнча айып тагылды.

Кылмыш иши Бишкек шаарынын Октябрь райондук сотуна жөнөтүлдү.

Автор: Нургазы Аматов