Алмазбек Атамбаев 6 миллионунчу кыздын үй-бүлөсүнө турак үй берүүнү жана 1 миллион сомдук депозит ачууну тапшырды

Алмазбек Атамбаев бүгүн, 26-ноябрда премьер-министр Темир Сариев менен жолугуп, кыргыз өлкөсүндө төрөлгөн 6 миллионунчу жаран тууралуу маалымат алды.

Президент жаңы төрөлгөн ымыркайдын ата-энесин куттуктап: "Калктын санынын өсүшү - ынтымактуу жашоонун көрсөткүчү, өлкөнүн келечегине болгон адамдардын ишенимин билдирет",- деди.

Ошондой эле 6 миллионунчу кызга 1 000 000 (бир миллион) сомдук депозиттик эсеп ачууну жана анын үй-бүлөсүнүн курамын эске алып турак үй берүүнү тапшырды. Мындан сырткары 6 миллионунчу кыз менен бир убакта төрөлгөн 10 баланын ата-энесине 100 миң сомдон берүүнү буюрду.

Белгилей кетсек, ымыркай Ош шаарында саат 18:12де аскер кызматкери Алмаз Кожошевдин үй-бүлөсүндө 3 килограмм 870 грамм салмакта төрөлдү. Энеси Рахат Белекованын жана кыздын ден соолугу жакшы.

Кечээ, 25-ноябрда саат 18:00дөн 26-ноябрда саат 06:00гө чейин өлкөбүздүн аймагында 122 ымыркай төрөлгөн.

Айта кетсек, өлкөдө 5 миллионунчу жаран 2002-жылдын 27-августунда жарык дүйнөгө келген. Анын аты-жөнү - Тынчтыкбек Курамаев. Ошол маалда президент тарабынан Курамаевдердин үй-бүлөсүнө Бишкектен 3 бөлмөлүү үй берилген.

Автор: Айпери Ганыжан кызы
Фото: Султан Досалиев