Асылбек Жээнбеков менен Казакстандын парламент төрагасы кызматташтыктын абалын талкуулашты

Жогорку Кеңештин спикери Асылбек Жээнбеков 26-ноябрда Казакстандын Парламент мажилисинин төрагасы Кабибулла Жакупов менен жолугушту.

ЖКнын маалымат кызматына таянсак, жолугушууда Жээнбеков бардык деңгээлде эки тараптуу мамилелердин активдүү өнүгүп жатканын белгилеп, кызматташтыкты мындан ары да өнүктүрүүгө стимул берүүчү парламенттер аралык байланыштардын эки жана көп тараптуулугуна оң баасын берди.

Кыргыз өлкөсүнүн кыска убакыт аралыгында Евразиялык экономикалык биримдикке кошулуусуна көрсөткөн колдоосуна жана өлкөнүн ЕАЭБге кирүүсүндөгү иш-чараларды аткарууга көрсөткөн каржылык жардамы үчүн ыраазычылык билдирди. “Биздин мамлекеттерге кыргыз өлкөсүнүн ЕАЭБге жеңил ыңгайлашуусу үчүн Казакстан тараптын 100 миллион доллар бөлүшү боюнча эки мамлекеттин башчылары тарабынан жетишилген макулдашууну жакынкы аралыкта ишке ашыруу өтө маанилүү”,- деди Жээнбеков.

Жакупов Кыргыз Республикасы биометрикалык маалыматтарды колдонуу менен парламенттик шайлоону ийгиликтүү өткөргөнүн айтты.

“Кыргыз Республикасындагы парламенттик шайлоонун таза өткөнүнө дүйнө коомчулугу күбө болду. Ал эми сиздин кайрадан Жогорку Кеңештин төрагалыгына шайланышыңыз сизге дагы бир ирет жогорку ишеним, жоопкерчилик артылганын айгинелейт. Бул өз кезегинде парламенттер аралык кызматташууну мындан ары дагы өнүктүрүүдө маанилүү ролду ойнойт”,- деди спикер.

Автор: Автандил Добулбеков