"Аалам периси-2015" сынагынын уюштуруучулары алып баруучунун жаңылыштыгынан таажынын башка кызга кийгизилиши боюнча кечирим сурашты

Лас-Вегас шаарында өткөн сынакта филиппиндик Пия Алонсо Вуртсбах "Аалам периси-2015" наамын жеңип алды. Бул тууралуу 21-декабрда чет элдик басылмалар жазып чыгышты.

Сыйлык тапшыруу учурунда алып баруучулукту аркалаган актёр Стив Харви адашып кетип, сулуулар сынагын колумбиялык Ариадна Гутиере жеңгенин жар салган. Ага таажы кийгизилгенден бир нече мүнөт өткөндө алып баруучу жаңылыштык кеткенин айткан. Андан кийин колумбиялык сулууга кийгизилген таажы чечилип, кайра 26 жаштагы Вуртсбахка кийгизилген. Бул боюнча сынактын уюштуруучулары интернеттеги социалдык баракчасына "түз эфирде адам кемчилик кетириши мүмкүн" деген билдирүү жазып, колумбиялык жана филиппиндик сулуулардан, алардын жакындарынан жана күйөрмандарынан кечирим сурашты.

Пия Алонсо Вуртсбах Германияда туулган. Филиппин-немис модели катары таанымал болгон сулуунун Филиппиндин президенти Бенигно Акино III менен байланышы бар деп айтылып келет. "Аалам периси" наамын алуу үчүн 80 мамлекеттин өкүлдөрү катышты.

Автор: Айпери Ганыжан кызы