Жалал-Абад. Ноокенде эки бала бакча ачылды

Жалал-Абад облусунун Ноокен районуна караштуу Жеңиш айылында №32-орто мектептин базасында бала бакча ачылды. Бул тууралуу Билим берүү жана илим министрлигинен 23-декабрда билдиришти.

Бала бакчанын ачылышына өкмөттүн облустагы өкүлү Жумагүл Эгембердиева, райондук билим берүү бөлүмүнүн башчысы Бакыт Козуев, жергиликтүү бийлик өкүлдөрүү жана айыл тургундары катышышты.

Жогоруда аталган мектеп 1993-жылы курулган. 360 бала билим алып келген мектептин бир бөлүгү баштапкы багыт боюнча пайдаланылбай келген. Мектептин ошол бөлүгүндө 900 миң сомго оңдоп-түзөө иштери жүрүп, ал жерге бала бакча ачылды.

Мындан сырткары Кокондук айылындагы орто мектептин базасында да бала бакча ачылды. Имаратты оңдоого жергиликтүү бюджеттен 550 миң сом сарпталган.

Автор: Айпери Ганыжан кызы