1-январда 14 өрт кырсыгы катталды: Чүйдө өчүрүлбөгөн тамекинин айынан батир өрттөнүп, бир адам каза тапты

Өткөн сутка ичинде республиканын аймагында 14 өрт кырсыгы катталып, өрттү өчүрүүгө 15 бөлүм тартылган. Бул тууралуу ӨКМнын басма сөз кызматы билдирди.

Маалыматка ылайык, Кара-Балта шаарындагы Жайыл баатыр көчөсүндө “Кара-Балта” мейманканасы өрттөнгөн. Бөлмөдөгү 1 керебет, матрац, төшөнчүлөр жана 2 чарчы метр жыгач пол күйгөн. Мейманкананын 2 кабаты түтүнгө толуп, 12 адам эвакуацияланган. Өрттүн себеби такталууда.

Мындан тышкары Чүй облусундагы Аламүдүн районунун Гроздь айылындагы үйлөрдүн батиринде өрт чыккан. Турак бөлмөдө 1 керебет, төшөнчүлөр, 20 чарчы метр жыгач пол күйгөн. Өрт чыккан жерден жашы 30 чамасындагы кыргыз улутундагы адамдын түтүнгө ууланган жансыз денеси табылган. Өрттүн себеби тамеки тартуудагы этиятсыздык экени анык болду.

Автор: Нургазы Аматов