Мордун туура эмес салынышынан, электр жабдууларын куроодо эреженин бузулушунан өткөн суткада өлкөдө 10 өрт кырсыгы катталды

Өткөн сутка ичинде Жарандык коргонуунун Өрткө каршы кызматынын маалыматы боюнча, республиканын аймагында 10 өрт кырсыгы катталып, аларды өчүрүүгө 10 өрт өчүрүү бөлүмү тартылган. Бул тууралуу 4-январда Өзгөчө кырдаалдар министрлигинин басма сөз кызматы билдирди.

Маалыматка караганда, Аламүдүн районунун Орто-Сай айылындагы мончонун морунун тегерегиндеги 16 чарчы метр жыгачтан жасалган шыбы, дубалдары күйгөн. Өрт мордун туура эмес түзүлүшүнөн улам келип чыккан.

Москва районунун Беловодск айылындагы “Мээрим-монитор” үй-бүлө тибиндеги балдар үйүнүн металл менен жабылган ашканасынын, кампасынын 56 чарчы метр чатыры, шифер менен жабылган фойесинин 35 чарчы метр чатыры, ашкана эмереги, 3 эшик, 2 терезе күйгөн. 1 тарбиячы жана 3 бала өрт өчүрүүчүлөр тарабынан куткарылган. Өрт кырсыгы электр жабдууларын куроодо эреженин бузулушунан келип чыккан.

Жалал-Абад облусунун Шамалды-Сай шаарчасында А.Жунушбаевге таандык Форд-Транзит үлгүсүндөгү унаа толугу менен күйгөн. Өрт электр жабдууларын куроодо эреженин бузулушунан улам болгон.

Автор: Айпери Ганыжан кызы