Жалал-Абадда Жаңы жылга караган түнү 3 адамды бычактаган өспүрүм колго түштү

31-декабрдан 1-январга караган түнү Жалал-Абад шаарында 3 адамды бычактап, бир нече жерге уурулукка кирген 17 жаштагы жигит кармалды. Бул тууралуу SUPER.KG порталына облустук милициядан билдиришти.

Маалым болгондой, таңкы саат 4:00 чамасында Жалал-Абад шаарындагы Р.Азимов көчөсүндө бараткан жаранды белгисиз адам эч бир себепсиз бычак менен сайып кеткен. Андан соң ал шаар аймагында дагы 2 жаранды себепсиз бычактап, денелерине оор жаракат келтирген. Ошол эле түнү бир эле мезгилде шаардагы көп кабаттуу үйлөргө, дүкөндөргө уурулукка кирип, тургундарды бычак менен коркуткан.

"Милиция кызматкерлери кылмышка шектүүнүн аты-жөнү К.М. уулу экенин аныкташкан. Ыкчам иликтөө амалдарынын жүрүшүндө ал колго түшкөн. Кармалган өспүрүм күбөлөрдүн көрсөтмөлөрүнүн жана далил буюмдарынын негизинде аталган кылмыштарды өз колу менен жасаганын ырастаган. Азыркы учурда ага карата соттук-медициналык экспертиза дайындалып, анын психикалык оорусу бар же жок экени текшерилүүдө",- дешти милициядан.

Эскерте кетсек, жарандарды бычактаган жигит мурда жергиликтүү кафеде самса жасап иштегени айтылган.

Автор: Нургазы Аматов