Австрияда 72 жаштагы киши аялын жиликтеп, башын цементтеп туруп сууга таштап, андан кийин өзү сууга чөгүп өлдү

Австрияда 72 жаштагы киши 71 жаштагы аялын жиликтеп, башын цементтеп туруп сууга чөктүрүп жиберип, андан кийин өзү сууга чөгүп каза болгон. Бул тууралуу бүгүн, 6-январда чет элдик массалык маалымат каражаттары жазып чыгышты.

Маалыматка ылайык, 3-январь күнү Траунзе көлүнүн жээгинен аял кишинин жиликтенген дене мүчөлөрү салынган чемодан табылган. Ошол эле күнү дагы бир чемодан табылып, анын ичинде да ал аялдын башка дене бөлүктөрү бар болгон. Изилдөө иштеринин алкагында бир суткадан кийин ошол эле көлдүн 5 метрлик тереңдигинен буту-колуна оор мүшөктөр байланган эркек кишинин сөөгү табылган. Аны кароо учурунда денесинен кыйноо же башка белгилер байкалган эмес. Дагы бир суткадан кийин көлдүн түбүнөн аялдын башы цементтелген абалда табылган. Полициянын версиясы боюнча, 72 жаштагы киши алгач аялын өлтүрүп, андан соң өзүнө кол салган.

Алдын ала маалыматтарга ылайык, окуя 25-декабрь менен 1-январь убакыт аралыгында болгон. Учурда улгайып калган киши эмне себептен мындай мыкаачылыкка баргандыгы иликтенүүдө.

Автор: Мальвина Уметбекова