"Жалал-Абадда табылган гранатомёт жана 6 миңге жакын ок-дарыларга тиешеси бар" деп милициянын майору камакка алынды

"Жалал-Абаддагы калктуу конуштардын биринен табылган гранатомёт жана 6 миңге жакын ок-дарыларга тиешеси бар" деп милициянын майору Бөрүбай Райымбеков кармалды. Бул тууралуу бүгүн, 19-январда SUPER.KG порталына күч түзүмдөрүндөгү ишенимдүү булактар билдиришти.

Белгилүү болгондой, Б.Райымбеков Жалал-Абад облустук ички иштер башкармалыгынын курал-жарак менен камсыздоо бөлүмүндө ага инспектор болуп эмгектенген. Учурда Б.Райымбеков УКМКнын тергөө абагында сурак берүүдө. Жалал-Абад облустук ички иштер башкармалыгынын кампасындагы курал-жарактар, ок-дарылар ордунда экени аныкталды. Учурда өздүк коопсуздук кызматы бул факт боюнча иликтөө иштерин жүргүзүүдө.

Эске салсак, бул факт боюнча жакынкы аралыкта Сириядагы согуштук аракеттерге катышып келген адам кармалган. Иликтөө иштеринин алкагында анын 2015-жылдын июль айында жок кылынган казакстандык Т.Жумагулов жана Ж.Амиров башында турган террордук топко катыштыгы бар экени аныкталган.

Автор: Мальвина Уметбекова