Жылнаама, 22-январь: Мындан 22 жыл мурун "Кыргызстан - жалпыбыздын үйүбүз" аттуу ураан кыргыз өлкөсүндөгү калктардын I Курултайында кабыл алынган

* Мындан 22 жыл мурун, 1994-жылы "Кыргызстан - жалпыбыздын үйүбүз" аттуу ураан Кыргыз Республикасынын калктарынын I Курултайында кабыл алынган. Курултайда өлкөбүздө жашаган калктардын көйгөйү козголуп, этникалык топтор арасындагы ынтымак-ырашкерчиликти арттыруу керектиги белгиленген. Курултай соңунда Кыргызстан калктарынын ассамблеясы уюштурулуп, анын жетекчилигине таанымал саясий жана коомдук ишмер С.Бегалиев шайланган. Аталган ассамблеяга Славяндар фонду, ахысхалык "Астүрк", корейлердин "Чинсон", уйгурлардын "Иттипак", өзбектердин "Орзу", немецтердин "Фольстрат", күрддөрдүн "Ныштиман", дунгандардын ассоциациялары, татар-башкыр калктарынын "Туган тел" маданий борбору, еврейлердин "Менора" маданият коому кирген.

* Мындан 15 жыл мурун, 2001-жылы “Ар-намыс” партиясынын лидери, 4-5-чакырылыштагы ЖКнын депутаты Феликс Кулов “кызмат абалынан кыянаттык менен пайдаланган” деген берене боюнча 7 жылга эркинен ажыратылган. 2005-жылы 24-мартта элдик толкундоолордун натыйжасында ошол убактагы бийлик кулатылганда Кулов түрмөдөн чыгарылган.

* Мындан 11 жыл мурун, 2005-жылы мексикалык пианист, композитор, дүйнөгө белгилүү “Besame mucho” (“Өпчү мени”) ырынын автору Консуэло Веласкес Торрес жүрөк оорусунан улам каза болгон.
Консуэло Веласкес 2004-жылы кокустан жыгылып кетип үч кабыргасын сындырып алып, жүрөгүнө доо кеткен. Ошол кырсык музыкант айымды өлүмгө алып келген.
Консуэло Веласкестин белгилүү “Besame mucho” ыры автор тарабынан 1941-жылы 16 жашында жазылган. Ал эми 1944-жылы бул ыр Нью-Йорктогу хит-парадда жеңип чыккан эң алгачкы мексикалык ыр болгон. Андан соң ал ыр бүтүндөй АКШ, Европа, Азия жана Латын Америкасына тарап, хитке айланган.

* Мындан 8 жыл мурун, 2008-жылы “Патриот”, “Баатырдын окуясы”, “Өркөчтүү тоо” тасмаларына катышкан австралиялык актёр Хитклифф Эндрю Лежердин жансыз денеси өзүнүн Нью-Йорктогу батиринен табылган. Актёрдун өлүмүнүн себеби дароо билинбей, атайын жүргүзүлгөн изилдөөлөрдө анын медициналык, наркотикалык жана башка дары-дармектерден ууланып каза болгондугу белгилүү болгон.
Актёрдун сөөгү өзүнүн мекени Австралияга жөнөтүлүп, кичи мекени Перт шаарында жерге берилген. Сүйүктүү актёру менен коштошууга 500дөн ашуун анын күйөрманы, кесиптештери келишкен.

22-январда Кыргыз Республикасында жана дүйнөдө орун алган окуялар тууралуу кененирээк бул жактан окуй аласыздар.

Автор: Гүлзат Мамытканова